Stock Market Fraud | सेवानिवृत्त सैनिकासह अनेकांना लाखोंना गंडविले; जास्तीचा परतावा देण्याचे आमिष भोवले

वैजापूर पोलिसांत गुन्हा दाखल 

 शेअर मार्केटमधील गुंतवणुकीतून ( Investment in stock  market ) चांगला परतावा देण्याचे आमिष दाखवून माजी सैनिकासह त्यांच्या सहकाऱ्यांची ८६ लाख ७१ हजार रुपयांची फसवणूक केल्याची घटना वैजापुरात (Vaijapur ) उघडकीस आली. याप्रकरणी एका महिलेसह दोन जणांविरुद्ध पोलिसांत फसवणुकीचा गुन्हा दाखल करण्यात आला आहे. 

 सेवानिवृत्त  सैनिक संजीव शामराव मतसागर (रा. जरुळ) यांनी पोलिसांत फिर्याद दिल्यानंतर शुक्रवारी ही कारवाई करण्यात आली. सचिन बाबासाहेब बडे व अश्विनी विलास खेडकर दोघे रा. खिर्डी, तालुका पाथर्डी अशी गुन्हा दाखल करण्यात आलेल्यांची नावे असून सध्या ते वैजापूर शहरातील स्वामी समर्थनगर भागात राहत असल्याचे तक्रारीत म्हटले आहे.

या दोघांनी स्वामी एंटरप्रायझेस ही प्रायव्हेट लिमिटेड संस्था स्थापन करुन आमच्या संस्थेमध्ये शेअर मार्केटमध्ये गुंतवणूक करा व गुंतवणूक केलेल्या पैशांवर दहा टक्के परतावा मिळवा. असे आमिष संजीव मतसागर व त्यांच्या सहकाऱ्यांना दाखवले. या आमिषाला भुलून मतसागर व अन्य व्यक्तींनी मागील वर्षी १९ जुलै ते १० ऑक्टोबर या कालावधीत तब्बल ८६ लाख ७१ हजार रुपये गुंतवले. 

मात्र आरोपींनी या रकमेवर दहा टक्के परतावा न देता तसेच मुळ रक्कम न देता फिर्यादी व अन्य व्यक्तींची आर्थिक फसवणूक केली अशी तक्रार देण्यात आली आहे. त्यावरुन वैजापूर पोलिस ठाण्यात गुन्हा ( Vaijapur Police station) दाखल करण्यात आला असून पुढील तपास सहायक पोलिस निरीक्षक देशमुख करीत आहेत.