राज्य शासनाचा निर्णय
डॉक्टर, इंजिनिअरप्रमाणे शिक्षकांच्या ( Teachers ) नावापुढे देखील आता इंग्रजी भाषेत 'Tr' तर मराठीत 'टी' असे संबोधन लिहिता येणार आहे. याशिवाय राज्यातील सर्व व्यवस्थापनाच्या शाळांतील गुरूजींना ड्रेसकोड लागू करण्याचा निर्णय घेतला आहे. राज्यातील सर्वच माध्यमांच्या शाळांतील गुरूजींसाठी आता विशिष्ट पेहराव ( Dress code) असणार आहेत. याबाबत राज्य शासनाच्या ( State Government) शालेय शिक्षण व क्रीडा विभागाने अध्यादेश काढून मार्गदर्शक सूचना दिल्या आहेत. त्यामुळे यापुढे शासनाने ठरवून दिलेल्या पेहरावच गुरुजींना शाळेत परिधान करावा लागणार आहे. दरम्यान गुरूजींना ड्रेसकोड लागू करण्याच्या निर्णयाबरोबरच त्यांना यापुढेही टीशर्ट व जीन्स पॅंट घालून शाळेत जाता येणार नसल्याचेही नमूद केले आहे.
राज्यातील स्थानिक स्वराज्य संस्था, खाजगी, अल्पसंख्याक आदी सर्व व्यवस्थापना अंतर्गत अनुदानित/अंशतः अनुदानित/विनाअनुदानित/स्वयंअर्थसहाय्यित तसेच अल्पसंख्यांक व्यवस्थापनाच्या सर्व माध्यमांच्या व सर्व बोर्डाच्या शाळांतील कार्यरत शिक्षक हे भावी पिढी घडवीत असतात. तसेच जनमानसात त्यांच्याकडे गुरु/मार्गदर्शक म्हणून पाहिले जाते. या शिक्षकांचा संबंध हा विद्यार्थी, पालक, गावातील प्रतिष्ठीत व्यक्ती व लोकप्रतिनिधींशी येत असतो. तसेच त्यांच्या सोबत संवाद होत असतो.
अशावेळी त्यांची वेशभूषा हा त्यांच्या व्यक्तिमत्वाचा अत्यंत महत्वाचा भाग म्हणून पाहिला जातो. संबंधितांच्या वेशभूषेवरुनच ते कार्यरत असलेल्या पदाची एक विशिष्ट छाप पडत असते. त्यामुळे शाळेमध्ये विद्यार्थ्यांना अध्यापनाचे काम करीत असताना वेशभूषेबद्दल जागरुक राहून आपली वेशभूषा ही आपल्या शाळेस व पदास किमान अनुरुप ठरेल, याची सर्वतोपरी काळजी घेणे अभिप्रेत आहे.
सामान्यतः विद्यार्थी हे अनुकरणप्रिय असतात. त्यामुळे जर शिक्षकीय पदाची वेशभूषा ही अशोभनीय, अव्यवस्थित किंवा अस्वच्छ असेल तर त्याचा अप्रत्यक्ष परिणाम त्यांच्या एकंदरीत व्यक्तीमत्वासह त्यांच्यासमोर अध्ययन करणाऱ्या विद्यार्थ्यांवर होत असतो. ही बाब विचारात घेता, राज्यातील सर्व संबंधित व्यवस्थापनांच्या शाळांतर्गत कार्यरत शिक्षकांकरीता दैनंदिन पेहराव कशा पध्दतीचा असावा याबाबत शासनाने मार्गदर्शक सूचना दिल्या आहेत.
वाहनांवरही लावू शकतात बोधचिन्ह
राज्यातील सर्व संबंधित व्यवस्थापनांच्या शाळांतर्गत कार्यरत शिक्षकांच्या नावापूर्वी इंग्रजी भाषेत "Tr" तर मराठी भाषेत "टी" असे संबोधन लावण्यात यावे. तसेच यासंदर्भातील बोधचिन्ह आयुक्त (शिक्षण), महाराष्ट्र राज्य, पुणे यांनी सुनिश्चित करुन त्यास यथोचित प्रसिद्धी देण्यात यावी. सदर संबोधन व बोधचिन्ह शिक्षकांना त्यांच्या वाहनावर लावता येईल. सदर सूचना राज्यातील स्थानिक स्वराज्य संस्था, खाजगी व्यवस्थापनांच्या अनुदानित/अंशतः अनुदानित/विनाअनुदानित/स्वयंअर्थसहाय्यित तसेच अल्पसंख्यांक व्यवस्थापनाच्या सर्व बोर्डाच्या व सर्व माध्यमांच्या शाळेतील शिक्षकांना लागू राहतील.
रंगाचा अधिकार शाळेला
शाळेतील शिक्षक व शिक्षिकांना कोणत्पेया रंगाचा पेहराव असावा. हे ठरविण्याचे अधिकार मात्र शाळेला असणार आहे. परंतु असे असले तरी चित्रविचित्र, गडद व नक्षीकाम केलेला पेहराव परिधान न करण्याबाबत स्पष्ट सूचना देण्यात आल्या आहेत.
काय आहेत सूचना ?
१) सर्व शिक्षकांचा दैनंदिन पेहराव हा शिक्षकीय पदास अनुसरुन असावा.
२) सर्व शिक्षकांनी परिधान केलेला पेहराव हा व्यवस्थित असावा. जसे महिला शिक्षकांनी साडी अथवा सलवार/चुडीदार, कुर्ता, दुपट्टा अशा पध्दतीने पेहराव करावा. तसेच पुरुष शिक्षकांनी शर्ट आणि ट्राऊझर पॅन्ट, शर्ट इन करुन परिधान केलेला असावा. गडद रंगाचे व चित्रविचित्र नक्षीकाम/चित्रे असलेले पेहराव परिधान करु नयेत. शिक्षकांनी जीन्स व टी-शर्टचा वापर शाळेमध्ये करु नये.
३) परिधान केलेला पेहराव स्वच्छ व नीटनेटका असावा. याची दक्षता सर्व शिक्षकांनी घ्यावी.
४) शाळेने सर्व शिक्षकांकरिता एकच ड्रेस कोड ठरविण्यात यावा.
५) पुरुष व महिला शिक्षकांकरीता परिधान करावयाच्या पेहरावाचा रंग कोणता असावा. हे संबंधित शाळेने निश्चित करावे.
६) पुरुष शिक्षकांनी परिधान करावयाच्या शर्टचा रंग हा फिकट असावा व पॅन्टचा रंग गडद असावा.
७) महिला व पुरुष शिक्षकांनी पोषाखाला शोभतील अशी पादत्राणे (उदा. पुरुषांनी शूज) वापरावी.
८) स्काऊट गाईडच्या शिक्षकांना स्काऊट गाईडचेच ड्रेस राहतील.
९) वैद्यकीय कारण असेल तर पुरुषांना/महिला शिक्षकांना बूट (शूज) वापरण्यातून सवलत देण्यात यावी.
