एका दुचाकीस्वारासह चिमुकलीचा मांजाने गळा कापल्याची घटना मकरसंक्रांतीच्या दिवशी वैजापूर शहरात घडली. दोघांनाही गंभीर दुखापत झाली असून त्यांना उपचारासाठी छत्रपती संभाजीनगर येथे हलविण्यात आले आहे.
पुंडलिक भागाजी गायकवाड (६५ रा. गायकवाडवाडी ) व इनाया शेख ( सहा महिने रा.खंडाळा ) अशी जखमींची नावे आहेत. याबाबत अधिक माहिती अशी की, पुंडलिक गायकवाड हे दुचाकीवरून जात असताना मांजा गुंतून त्यांचा गळा कापला गेला. त्यामुळे जखम होऊन मोठ्या प्रमाणात रक्तस्त्राव झाला. ही घटना शहरातील स्टेशन रस्त्यावरील पंचायत समिती कार्यालयासमोर घडली. त्यांना गंभीर अवस्थेत उपचारासाठी शहरातील एका खासगी रुग्णालयात दाखल करण्यात आले. परंतु त्यांना गंभीर दुखापत झाल्याने पुढील उपचारासाठी छत्रपती संभाजीनगर येथे हलविण्यात आले आहे. दुसऱ्या एका घटनेत इनाया शेख या सहा महिन्यांच्या चिमुकलीचा मांजाने गळा कापला गेला. ही घटना शहरातील खानगल्लीत घडली.
थेट कारवाई करा
दरम्यान गेल्या काही दिवसांत मांजामुळे चार ते पाच जण जखमी झाल्याच्या घटना घडल्या. यात एकाचा कान तर अन्य तरुणांसह एका वृध्दाचा थेट गळा कापला गेला. त्यामुळे त्यांना गंभीर दुखापत झाली आहे. नायलॉन मांजा विक्री करणाऱ्यांचा शोध घेऊन त्यांच्याविरुद्ध कारवाई करण्याची मागणी होत आहे.
